ମକର ସଂକ୍ରାନ୍ତିରେ ଘରେ ପ୍ରସ୍ତୁତ କରନ୍ତୁ ଏହି ବ୍ୟଞ୍ଜନ

0
4

ସୂର୍ଯ୍ୟଙ୍କ ଉତ୍ତରାୟଣ ଗତିକୁ ସାରା ଦେଶରେ ମକର ସଂକ୍ରାନ୍ତି ପର୍ବ ଭାବେ ପାଳନ କରାଯାଏ। ହିନ୍ଦୁ ଧର୍ମରେ ଏହି ପର୍ବର ଏକ ସ୍ବତନ୍ତ୍ର ମହତ୍ୱ ରହିଛି। ଚଳିତ ବର୍ଷ ଜାନୁୟାରୀ ୧୫ରେ ଏହାକୁ ପାଳନ କରାଯାଉଛି। ଏହି ଦିନ ଗୁଡରେ ତିଆରି ହୋଇଥିବା ଭିନ୍ନ ଭିନ୍ନ କିସମର ଖାଦ୍ୟ ପ୍ରସ୍ତୁତ କରାଯାଇଥାଏ। ଏହି ପର୍ବ ଫସଲ ବୁଣିବା ଓ ଅମଳ ସହ ଜଡିତ ଥିବା ବେଳେ ରାଶିକୁ ଅଧିକ ଗୁରୁତ୍ୱ ଦିଆଯାଇଥାଏ। ତେଣୁ ଘରେ ଘରେ ଗୁଡ଼ରେ ତିଆରି ହୋଇଥିବା ରାଶି ଲଡୁକୁ ବେଶୀ ପସନ୍ଦ କରାଯାଇଥାଏ।  ଏହାକୁ ତିଆରି କରିବା ପାଇଁ ଆସନ୍ତୁ ଜାଣିବା ଏହାର ବିଧି।
ରାଶି ଲଡୁ ତିଆରି କରିବା ପାଇଁ ସାମଗ୍ରୀ: ୨କପ୍‌ ରାଶି, ୩/୪ କପ୍‌ ଗୁଡ, ଅଧା କପ୍‌ କଟା ଓ ଭଜା ହୋଇଥିବା ବାଦାମ, ଗୋଟେ ବଡ ଚାମଚ ଦେଶୀ ଘିଅ, ଗୋଟେ ଛୋଟ ଚାମଚ ଇଲାଇଚି ପାଉଡର୍‌।
ରାଶି ଲଡୁର ବିଧି: ପ୍ରଥମେ ଏକ କଡେଇକୁ ମଧ୍ୟମ ଆଞ୍ଚରେ ଗରମ କରନ୍ତୁ। ଏଥିରେ ରାଶି ପକାଇ ୩ରୁ୪ ମିନିଟ୍‌ ପର୍ଯ୍ୟନ୍ତ ଭାଜନ୍ତୁ। ଏହା ହାଲୁକା ମାଟିଆ ଦେଖାଯିବା ପରେ ରାଶିକୁ ଏକ ପ୍ଲେଟ୍‌ରେ ରଖିଦିଅନ୍ତୁ। ଏବେ ସେହି କଡେଇରେ ଏକ ଚାମଚ ଘିଅ ପକାଇ ଗୁଡକୁ ଟିକି ଟିକି କରି ଭାଙ୍ଗି ସେଥିରେ ପକାନ୍ତୁ ଏବଂ ଏହାକୁ ମଧ୍ୟମ ଆଞ୍ଚରେ ବସାଇ ଦିଅନ୍ତୁ। ଗୁଡ ତରଳିଯିବା ପରେ ସେଥିରେ କଟା ବାଦାମ ଓ ଇଲାଇଚି ପାଉଡରକୁ ପକାଇ ଗୋଳାଇ ଦିଅନ୍ତୁ। ଏହାପରେ ଭାଜିହୋଇଥିବା ରାଶିକୁ ସେଥିରେ ପକାଇ ଭଲଭାବେ ମିଶାନ୍ତୁ। ଏବେ ପ୍ରସ୍ତୁତ ହୋଇଗଲା ସ୍ବାଦିଷ୍ଟ ରାଶି ଲଡୁର ମିଶ୍ରଣ। ଏହାକୁ ଏକ ପ୍ଲେଟ୍‌ରେ ରଖିଦିଅନ୍ତୁ। ଗରମ ଥିବା ଅବସ୍ଥାରେ ରାଶିକୁ ହାତରେ ଗୋଲ ଗୋଲ କରି ଲଡୁର ଆକାର ଦିଅନ୍ତୁ। ଆଉ ମନେରଖନ୍ତୁ ଏହି ମିଶ୍ରଣ ଥଣ୍ଡା ହୋଇଗଲେ ଭଲଭାବେ ଲଡୁ ତିଆରି ହୋଇପାରିବ ନାହିଁ। ତେଣୁ ଗରମରେ ହିଁ ଲଡୁ ତିଆରି କରନ୍ତୁ। ଏହାପରେ ଆଉ ଏହି ଲଡୁକୁ ୧ଘଣ୍ଟା ପର୍ଯ୍ୟନ୍ତ ଖୋଲା ପବନରେ ଛାଡ଼ି ଦିଅନ୍ତୁ। ଥଣ୍ଡା ହୋଇଗଲା ପରେ ଏହାକୁ ଏୟାର ଟାଇଟ କଣ୍ଟେନର ଡବାରେ ରଖିଦିଅନ୍ତୁ।

.