ଡାକ୍ତର ସ୍ୱାମୀର ଅବୈଧ ସଂପର୍କ ବିଷୟରେ ଜାଣି ପ୍ରେମିକା ଘରେ ନିଆଁ ଲଗାଇଲା ସ୍ତ୍ରୀ, ପୁଅ ସହ ଜୀବନ୍ତ ଦଗ୍ଧ ହେଲା ପ୍ରେମିକା

0
12

ଭରତପୁର(ରାଜସ୍ଥାନ) : ରାଜସ୍ଥାନର ଭରତପୁରରେ ଏକ ଲୋମଟାଙ୍କୁରି ଦେବା ଭଳି ଘଟଣା ଘଟିଛି । ସ୍ୱାମୀର ଅନ୍ୟ ଜଣେ ମହିଳା ସହ ଅବୈଧ ସଂପର୍କ ଥିବା ଜାଣି ସ୍ତ୍ରୀ ନିଜ ଶାଶୁ ସହ ମିଶି କରିଥିବା କାମ ଏବେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି । ରହୁଥିବା ଘରକୁ ଯାଇ ପ୍ରେମିକା ଓ ତା’ ପୁଅ ଦେହରେ କିରୋସିନ୍‌ ଢ଼ାଳି ନିଆଁ ଲଗାଇବା ପରେ ବାହାରପଟୁ କବାଟ ଦେଇ ଦେଇଥିଲେ ମହିଳା । ଯାହାଦ୍ୱାରା ଦୁହେଁ ବାହାରକୁ ନ ଆସି ପାରି ଜିଅନ୍ତା ଜଳି ଯାଇଥିଲେ । ଏହି ଘଟଣା ପରେ ଉଭୟ ମହିଳା ଓ ତାଙ୍କ ଶାଶୁ ପୁଲିସ ଆଗରେ ନିଜର ଦୋଷ ମାନିନେବା ସହ ପୁଲିସ ଡାକ୍ତର ସ୍ୱାମୀ ସହ ଦୁଇଜଣଙ୍କୁ ଅଟକ ରଖିଛି । ପଚରାଉଚରା ସମୟରେ ନିଆଁ ଲଗାଇବା ପରେ ଅଭିଯୁକ୍ତ ମହିଳା ନିଜେ ଅଗ୍ନିଶମ ବିଭାଗକୁ ଫୋନ କରି ଡ଼କାଇଥିଲେ ବୋଲି ଜଣା ପଡ଼ିଛି । ମୃତକଙ୍କ ନାଁ ଦୀପା ଦେବୀ ଓ ସୂର୍ଯ୍ୟ ବୋଲି ଚିହ୍ନଟ କରାଯାଇଛି ।

aajtak.intoday.in

 

ସୂଚନା ମୁତାବକ, ମୃତକ ଦୀପା ଦେବୀ ସ୍ୱାମୀ ଗଜରାଜ ସିଂହଙ୍କଠାରୁ ଅଲଗା ହେବା ପରେ ନିଜ ପୁଅକୁ ଧରି ଡାକ୍ତର ସୁଦୀପ ଗୁପ୍ତାଙ୍କ ଘରକୁ ଭଡ଼ାରେ ରହିବାକୁ ଆସିଥିଲେ । ଯାହା ପରେ ଧିରେ ଧିରେ ଦୀପା ଓ ସୁଦୀପଙ୍କ ମଧ୍ୟରେ ପ୍ରେମ ସଂପର୍କ ଆରମ୍ଭ ହୋଇଥିଲା । ଏ ନେଇ ସୁଦୀପଙ୍କ ପତ୍ନୀ ସୀମା ଗୁପ୍ତାଙ୍କୁ ସୂଚନା ମିଳିବା ପରେ ସେ ରାଗି ଯାଇଥିଲେ । ଗୁରୁବାର ସୀମା ନିଜ ଶାଶୁଙ୍କ ସହ ଦୀପା ରହୁଥିବା ଘରକୁ ଯାଇ ଦୀପା ଓ ତା’ର ପୁଅ ସୂର୍ଯ୍ୟ ଉପରେ କିରୋସିନ୍‌ ଢ଼ାଳି ନିଆଁ ଲଗାଇ ଦେଇଥିଲେ । ବାହାରପଟୁ କବାଟ ଦେବା ସହ ଅଗ୍ନିଶମ ବିଭାଗକୁ ଫୋନ କରି ଜଣାଇଥିଲେ ସୀମା । ଖବର ପାଇ ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚିବା ବେଳକୁ ଦୁହିଁଙ୍କର ମୃତ୍ୟୁ ହୋଇ ସାରିଥିଲା ।